Circular Tourism Albania – Drejt një sektori turizmi të qëndrueshëm dhe me përgjegjësi mjedisore

[aris_tasho]

Dhoma e Tregtisë dhe Industrisë Tiranë (DHTIT) po implementon projektin “Circular Tourism Albania”, i financuar nga Bashkimi Evropian, programi Erasmus +.

Ky projekt ka për qëllim të nxisë tranzicionin e gjelbër dhe digjital në sektorin shqiptar të turizmit dhe mikpritjes, përmes zbatimit të parimeve të ekonomisë rrethore, përmirësimit të menaxhimit të mbetjeve dhe forcimit të aftësive të gjelbra për bizneset dhe institucionet arsimore profesionale.

Projekti bashkon partnerë nga sektori i biznesit, arsimit profesional dhe institucione publike, duke synuar krijimin e një modeli kombëtar për turizëm të qëndrueshëm dhe rrethor.

Në këtë kuadër, ngremë si temë diskutimi “Ekonomia Rrethore në Sektorin e Ushqimit dhe Mikpritjes – Reduktimi i Mbetjeve, Krijimi i Vlerës”, si një nga problematikat më aktuale për bizneset shqiptare, që kërkon bashkëpunim të ngushtë midis akademisë, sipërmarrjeve dhe autoriteteve vendore për zhvillimin e zgjidhjeve të qëndrueshme dhe të zbatueshme.

[Tenida]

Një ide praktike për reduktimin e mbetjeve dhe zbatimin e ekonomisë rrethore në sektorin e mikpritjes është kalimi gradual nga produktet njëpërdorimëshe drejt sistemeve të rimbushjes dhe ripërdorimit. Në shumë hotele dhe restorante përdoren çdo ditë ambalazhe plastike për produkte higjienike, ujë apo pije, të cilat përfundojnë si mbetje. Duke vendosur pajisje rimbushëse për sapunë dhe shampo, si dhe duke përdorur shishe qelqi ose enë të ripërdorshme për pijet, bizneset mund të ulin ndjeshëm sasinë e mbetjeve plastike. Kjo praktikë ka edhe përfitim ekonomik, sepse furnizimi me shumicë dhe ripërdorimi i enëve është më pak i kushtueshëm në afat të gjatë sesa blerja e vazhdueshme e produkteve të vogla të ambalazhuara. Mendoj se nëse këto modele integrohen më gjerësisht në sektor, ato mund të kthehen në standard të turizmit të qëndrueshëm në Shqipëri dhe të rrisin besueshmërinë e destinacionit për turistët që kërkojnë shërbime më miqësore me mjedisin.

[Emilios (Emilios Zote)]

Mendoj se një mënyrë konkrete për të zbatuar ekonominë e gjelbër në sektorin e ushqimit dhe mikpritjes është krijimi i zinxhirëve të shkurtër të furnizimit midis bizneseve të turizmit dhe prodhuesve lokalë. Aktualisht, shumë hotele dhe restorante furnizohen me produkte të importuara ose përmes distributorëve të mëdhenj, gjë që rrit transportin, kostot dhe ndikimin mjedisor. Duke bashkëpunuar drejtpërdrejt me fermerë dhe prodhues vendas, bizneset mund të sigurojnë produkte sezonale, më të freskëta dhe me më pak ndikim në mjedis, duke mbështetur njëkohësisht ekonominë lokale. Për shembull, restorantet dhe hotelet në Sarandë mund të furnizohen me perime, fruta, vezë ose mish direkt nga fermerët e Konispolit, duke krijuar një cikël të qëndrueshëm furnizimi mes zonës bregdetare turistike dhe zonës rurale prodhuese.
Një zgjidhje praktike është që bizneset të krijojnë marrëveshje të qëndrueshme furnizimi me prodhues të zonës dhe të përshtatin menutë sipas sezonalitetit. Gjithashtu, origjina lokale e produkteve mund të theksohet në menu ose në ambient (“produkt i zonës”, “nga ferma lokale”), duke e kthyer qëndrueshmërinë edhe në vlerë marketingu për turistët. Mendoj se përhapja e kësaj praktike në sektor do të kontribuonte realisht në zhvillimin e një turizmi më të gjelbër në Shqipëri.